Komplikado

Nakakalito ang mga tao,
status nila'y pabago-bago.
Hindi ba't nakakaloko,
sarili naman ang ginagago.

Kailan lang ikaw ay masaya,
binanggit pa pati pangalan nya.
Lahat ng posts tungkol sakanya,
nasobrahan hoy, ang PDA na!

Ang inyong matamis na lambingan,
sagad hanggang umabot sa kalawakan.
Naka-tag pa kapag naghaharutan,
na-witness tuloy ng mamamayan.

Lumipas ang ilang buwan,
mukha mo'y natatabangan.
Umiiyak ka sa 'yong unan,
kasing dami ng ulan.

Sa Facebook mo'y naging single,
simpatya ng friends walang tigil.
Bakit mukhang nanggigigil,
dahilan ba'y sa iba siya naki-mingle?

Nakakatawa tulo'y malaman,
pagmamalaki'y walang kinaratnan.
Pagtapos ng inyong sarapan,
pasakit lang iyong kinahantungan.

PS:

Wala ka ng mukhang maihaharap,
sa taong nuon ikaw'y pinangarap.
Pagkakataong 'di mo nilasap,
ngayon sana'y ikaw'y nasa alapaap.

Sa takbo ng 'yong libido,
napasunod pati si kupido.
Sa tulad mong komplikado,
ikaw saakin'y naging burado.

Sumpa

Pansin mo ba kailan aking huling likha,
sapat na patunay isip biglang nadukha.
Walang halos mapalawak ni isang paksa,
nilisan ng katalinuhan-kaya sarili'y nagluluksa.

Ngunit 'di lingid sa likod ng isip,
likas, siya'y namamahinga't nananaginip.
Humanda ka't hahagupit ang kanyang ihip,
upang matugunan ang 'yong sariling sabik at naiinip.

Ngunit may banta sakanyang pagbabalik,
may natuklasang isang bagay na kahindik-hindik.
Na ang mga tula'y may bahid ng saltik,
inaalayan'y lumilisan sa paraang pa-wisik-wisik.

Napuna ng aking kahusayan,
sa mga katha kong may nilalaman.
Bawat taong hinandugan,
sila'y patuloy akong iniwanan.

Sumpa- 'yan aking biglang nagunita,
sa paraang alam ko'y duon nananalanta.
Wala man lang pinahayag na banta,
mambabasa ko tuloy todo sampalataya.